19-20 dekabr 2023 cü il tarixində Nizami Kino Mərkəzində Azərbaycan Respub­li­kasının Dövlət Turizm Agentliyi, Azərbaycan Turizm və Menecment Universitetinin, Tür­kiyə Respublikasının İqtisadi İnkişaf və Sosial Araşdırmalar İnstitutunun təş­ki­lat­çılığı, Azərbaycan Respublikası Elm və Təhsil Nazirliyi “Gənclərin Respublika Bədii Yaradıcılıq Evi” və “Çinar Yayımları” nəşriyyatının tərəfdaşlığı ilə Qlobal və Regional İnkişaf: “Cənubi Qafqaz regionunun iqtisadi inkişafının prioritet isti­qa­mətləri” mövzusunda beynəlxalq elmi-praktiki konfrans keçirilmişdir. Konfrans Azərbaycan Xalqının Ümummilli lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əlirza oğlu Əliyevin anadan olmasının 100 illiyinə həsr olunmuşdur. Konfransda Azərbaycan və qardaş Türkiyənin dövlət rəs­mi­ləri və ziyalıları iştirak etmişlər. Azərbaycan Turizm və Menecment Universitetinin rektoru İlham Mədətov tədbiri giriş nitqi ilə açaraq müstəqil Azərbaycan dövlətinin qurucusu, dahi siyasətçi və qüdrətli dövlət xadimi Heydər Əliyevin həyat və yaradıcılığı barədə geniş məlumat verdi. Heydər Əliyevin öz xalqını zamanın mürəkkəb tarixi-siyasi sınaqlarından uğurla çıxarmasından və ardıcıl mübarizə apararaq onu müstəqilliyə qovuşdurmuş qüdrətli şəxsiyyət olma­sın­dan danışdı. Rektor İ.Mədətov Ulu Öndərin açdığı elm yolunda yetişən gənclərin Azərbaycanın həm bu gününü, həm də sabahını işıqlandırdığını, ölkə başçımız İlham Əliyevin rəh­bər­li­yi altında səylə çalışdıqlarını və üzərlərinə düşən vəzifələri layiqincə yerinə yetir­dik­lərini diqqətə çatdırdı.

          İqtisadi İslahatların Təhlili və Kommunikasiya Mərkə­zi­nin direktoru iqtisad elmləri doktoru professor Vüsal Qasımlı “Orta Dəhlizin əsas dray­veri” mövzusunda çıxış etdi. Türkiyədən dəvət olunan qonaqlar sırasında İqtisadi inkişaf və Sosial Araşdırmalar İnstitutunun İKSAD başqanı Mustafa Letif Emek, Strateji Düşüncə İnstitutunun Başkanı Güray Alpar, Adana Alparslan Türkeş Bilim və Texnoloji Universitetinin rektoru Prof. Dr.Mehmet Tümay, Türkiyə Xarici İşlər Nazirliyinin Böyük Elçisi Hasan Yavuz çıxış edərək Azərbaycan və Türkiyə arasındakı qar­daş­lı­ğın davamı olaraq müstəqillik illərində Bakı-Tbilisi-Ceyhan, Bakı-Tbilisi-Qars, TRASSEKA layi­hə­lə­ri­nin reallaşması, Böyük İpək yolunun bərpası, hazırda isə Zəngəzur dəhlizinin açıl­ma­sı səylərindən, Qafqaz və Türk dünyası ölkələri arasında əlaqə­lərin geniş­lən­mə­sin­də Heydər Əliyevin müstəsna rola malik olmasından danış­dı­lar. Eyni zamanda Azərbaycan Respublikası və Türk Cümhuriyyətinin möhkəm təməllər üzərində qurulan iqtisadi, hərbi, sosial, elm, təhsil, mədəni sahələrdə əməkdaşlığı son nəticədə təkcə bu iki ölkənin deyil, ümumilikdə Avrasiya regio­nu­nunda iqtisadi inkişaf prioritetlərinin müsbətə doğru dəyişdiyini vurğu­ladılar. Qeyd olundu ki, məhz Heydər Əliyevin səyi nəticəsində bağlanan Əsrin Müqaviləsinin reallaşması bu gün Azərbaycanı Cənubi Qafqaz regionunda iqtisadi cəhətdən dayanıqlı və güclü bir dövlətə çevirmişdir. Davamlı yüksəliş yolunda inamla irəliləyən müasir Azərbaycan Heydər Əliyevin həyat amalının təntənəsidir.

Ulu Öndərin ölkəmizdə elmin və təhsilin inkişafı məqsədilə çoxsaylı qərarlar qəbul etməsindən, gənclərin xaricdə təhsil alması istiqamətində mühüm işlər görməsindən, baş­da hərb sahəsi olmaqla bir çox sahədə gənclərin qardaş Türkiyə və dünyanın di­gər inkişaf etmiş ölkələrinə təhsil almaq məqsədilə göndərilməsindən danışılmışdır.

Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində, o cümlədən ölkəmizin diplomatik arenada uğur qazanmasında yüksək təhsilli gənclərin rolunun önəmli olduğu vurğulanmışdır.

Beynəlxalq tədbir Heydər Əliyevin xatirəsinə həsr olunmuş konsert proq­ra­mı ilə yekunlaşmışdır.

Konfransda müxtəlif ölkələrdən gələn nümayəndələrin pa­nel­lər üzrə məruzələri dinlənilib və fikir mübadilələri aparılıb, səsləndirilən ma­raq­lı fikir­lə­rin və təkliflərin toplu şəkildə çap olunmasına qərar verilmişdir.